महादेव–देवींचा अपमान करणाऱ्या काँग्रेस उमेदवारांना जनता जागा दाखवेल — आमदार मुनगंटीवार
मूल शहरात श्रद्धा, संस्कार आणि भक्तीची परंपरा जपणाऱ्या महादेव, कन्यका देवी, साईबाबा, हनुमान यांसारख्या देवतांची भव्य देवस्थाने उभी राहिली. “ही मंदिरे का बांधली?” असा अवमानकारक सवाल काँग्रेसच्या उमेदवारांनी सभेत उपस्थित केल्याने, त्यांनी माझा नव्हे तर स्वतः देवांचा आणि लाखो भक्तांच्या श्रद्धेचा घोर अपमान केला आहे, अशी संतप्त प्रतिक्रिया आमदार सुधीर मुनगंटीवार यांनी दिली.
“महादेवाचे मठ म्हणजे मूलवासियांचे मनोधैर्य, देवीचे मंदिर म्हणजे जनतेच्या आशा–आकांक्षांचे पवित्र स्थळ. त्या दिव्य स्थळांवर प्रश्नचिन्ह उपस्थित करणाऱ्यांना ईश्वर स्वतः धडा शिकवील,” असा थेट इशारा मुनगंटीवार यांनी दिला.
रामलीला भवनजवळ झालेल्या काँग्रेसच्या सभेत उमेदवार प्रशांत समर्थ यांनी सोमनाथ रोडवरील महादेव व कन्यका देवी मंदिराबाबत ‘अनावश्यक’ आणि ‘ठेकेदाराकडून वस्तू गोळा करून बांधले’ असा आरोप केला. या वक्तव्याला धार्मिक आणि भावनिक दृष्ट्या गंभीर मानत मुनगंटीवार म्हणाले—
“हे फक्त माझ्यावरचे आरोप नाहीत, तर महादेवाच्या अस्तित्वावर बोट ठेवण्याचा, देवीच्या आरतीवर प्रश्न उपस्थित करण्याचा प्रयत्न आहे. हिंदू देवतांवर आरोप करून राजकारण करणे हे मूलच्या संस्कृतीशी आणि भक्तीभावाशी विश्वासघात आहे.”
याच चर्चेची लाट काँग्रेसच्या सभेतही उमटली. अनेक कार्यकर्त्यांनीच “देवतांचा अपमान करायला नको होता” अशी टीका कुजबुज स्वरूपात मांडल्याचेही ऐकायला मिळाले.
भव्य सभा, रिंकू राजगुरूंची उपस्थिती आणि विकासाची घोषणावेधक मांडणी
बाजार चौकात ‘सैराट’ फेम रिंकू राजगुरू यांच्या उपस्थितीत झालेल्या विशाल सभेत लोकांचा जनसागर उसळला होता. मुनगंटीवार यांनी आपल्या विकासकामांचा आढावा घेत, आगामी योजनांची घोषणाही केली—
दिव्यांग नागरिकांना ₹2,500 मासिक मानधन
गरजूंसाठी तिनचाकी सायकली
शहरातील सर्व आंगणवाड्या स्मार्ट आंगणवाडी रूपात
गरीब कुटुंबातील मुलांसाठी CBSE शाळेची उभारणी
फक्त ₹501 मध्ये विवाहसोहळा आयोजित करता येईल असा 2 एकर जागेवरील भव्य वातानुकूलित ‘कल्याण मंडपम्’
रिंकू राजगुरू यांनीही ‘सैराट’मधील लोकप्रिय डायलॉग ऐकवून, “विकास करणाऱ्यांना साथ द्या” असे आवाहन केले.
नगराध्यक्ष पदाचे उमेदवार प्रा. डॉ. किरण कापगते यांनीही प्रभावी भाषणातून जनतेचे मन जिंकले.
कॉंग्रेसकडून महादेव, कन्यका देवी, साईबाबा आणि हनुमान यांच्या मंदिरांबाबत अवमानकारक भाष्य झाल्याने शहरात संतापाची लाट पसरली असून, भक्तांच्या भावना तीव्र झालेल्या आहेत. देवतांचा मान राखण्यासाठी जनता मतदानातून उत्तर देईल, असा सूर शहरभर ऐकू येत आहे.
